‘Koñesimentu mak podér. Informasaun mak liberta. Edukasaun mak báze ba progresu, iha sosiedade hotu-hotu, iha família hotu-hotu.’
Kofi Annan, 1997

Ho luta ne’ebé Timor-Leste halo hodi defende povu nia direitus umanus iha ninia istória liu ba ne’e, aplikasaun padraun direitus umanus iha Timor-Leste la’ós de’it obrigasaun legál ida, maibé reprezenta dalan naturál dezenvolvimentu nian iha Timor-Leste independente. Maibé dalan ne’e bele hetan dezafiu karik laiha asesu ba instrumentu ne’ebé ita presiza atu lori realidade ne’e mai.

Objetivu husi instrumentu ida-ne’e atu halo luan asesu ba dokumentu sira ne’ebé relasiona ba tratadu internasionál direitus umanus nian ne’ebé Timor-Leste ratifika ona. Konstituisaun Repúblika Demokrátika Timor-Leste konsagra liberdade fundamentál sira ne’ebé iha karáter universál. Atu padraun sira-ne’e bele iha signifikadu ba promosaun no protesaun direitus umanus iha rai laran, importante katak ema iha koñesimentu kona-ba sira-nia sentidu no konteúdu.

Ohin loron, susar ba ema sira ne’ebé interesadu atu halo kle’an liután sira-nia koñesimentu kona-ba padraun hirak ne’e. Fatór ida, tanba ladún iha materiál ne’ebé hakerek iha lian Tetun kona-ba asuntu direitus umanus.

Aleinde fasilita asesu ba dokumentu hirak ne’e ba ema ne’ebé kaer podér-desizaun no atór relevante sira iha Timor-Leste, publikasun ne’e buka mós atu fó asesu ba ema hotu-hotu ne’ebé iha interese ba matéria ida-ne’e, hanesan instituisaun nasionál sira direitus umanus nian, lejisladór sira, órgaun estadu sira ne’ebé relevante, atór judisiál sira no organizasaun sira iha sosiedade sivil, husi rai sira ne’ebé halo parte iha Komunidade hosi Nasaun sira ne’ebé Ko’alia Lian Portugés (CPLP).

Provedoria Direitus Umanus no Justisa hein katak, ho instrumentu ida-ne’e, bele fó kontribuisaun ki’ik oan ida, maibé importante, ba promosaun no protesaun direitus umanus nian iha Timor-Leste no mós iha nasaun sira seluk ne’ebé halo parte iha CPLP.

Materiál sira
Ferramenta ida-ne’e inklui materiál hosi hun prinsipál rua:
• Tratadu Internasionál sira Direitus Umanus nian ne’ebé Timor-Leste ratifika ona
• Komentáriu no Lia-menon Jerál Hosi Komité sira Tratadu Oin-oin nian

Hanesan ezemplu ida, Konstituisaun konsagra direitu ba saúde ba ema hotu-hotu (artigu 57). Iha prátika, saida mak Estadu iha obrigasaun atu halo hodi ema hotu-hotu bele goza duni sira-nia direitu ba saúde? Ho rekursu ne’ebé limitadu, direitu ba saúde ne’e ninia implementasaun oinsá? Ezemplu seluk, tuir artigu 16 husi Konstituisaun, la iha ema ida ne’ebé bele sai objetu ba diskriminasaun. Saida mak sentidu husi diskriminasaun iha kontestu ne’e, kompara ho diferensiasaun lejítimu iha moris sosiedade loro-loron?

Asuntu hirak ne’e no sira seluk sai ona alvu ba interpretasaun hosi órgaun monitorizasaun sira tratadu direitus umanus nian, ne’ebé elabora iha sira-nia komentáriu ka lia-menon jerál sira. Komentáriu no lia-menon jerál ne’ebé relevante liu ba realidade Timor-Leste nian inklui iha ne’e iha lian Tetum, Portugés no Inglés. Dokumentu ne’ebé inklui iha ne’e relasiona ba iha área direitu sivíl no polítiku, ekonómiku, sosiál no kulturál, no mós tratadu espesífiku ba protesaun grupu vulnerável sira.

Instrumentu rua seluk mós dezenvolve mak:
• Relasaun entre padraun sira ne’ebé inklui iha Konstituisaun Timor-Leste no padraun sira ne’ebe mai hosi Tratadu oin-oin
• Ferramenta peskiza nian iha lian tolu (Portugés, Tetun no Inglés)